Guarda, ma guardala ch'è prusentusa!
Mi dannu l'anima cu sta fetusa.
No pozzu lejari, no passiari:
sup'a lu cocculu m'à di posari.
L'unghi mi russicu di lu currivu:
ntappu.ed'è inutili: mi pistu vivu.
'Nta sta gran cammara non avi lucu.
Ccà mmia à mu hiavura, chimm'avi focu!
Ccà mmia à mu spiccica l'anchi e li mani,
cca mmia à mu recita jornati sani.
Ma po' ài di vidari c'adasu adasu
veni e nci accommida sup'a lu nasu.
Jeu chi su disculu di stu locali,
ncignu la musica di li signali.
Ma chi nci motica la smaliditta
si no la scotulu cu la barritta!!
Poi torna e mescita nta lu cozzettu,
mbutta ed arrumbula pe' lu filettu;
ficcu li jidita di la mascija.
Ma chi! Va pigghiala!
La piccirija di nta la manica
mi nesci a cchianu pemmu nci libbra
di cchiù luntanu: e, mentr'eu dubbitu
c'à mu nci arringa,
sentu na pitina nta la milinga.
Sbattu e la scotulu: ma n'atru morzu
mi votu e.masticu comu nu corzzu.
Ca cu po' rejari ! Comu la cacciu?
Paru n'animulu. Paru nu pacciu.
Sponzi d'ariganu, masculi d'agghi,
fraschi e spinozzula, scupi, ventagghi,
crambi di ciliari, frundi d'avritta,
ciumbi chi pendinu di la soffitta...
Nghiernò, no servinu!
No mi serviru mancu quattordici muscheri ngiru.
Stanno m'ajiccanu puru l'acitu!
Chi muschi orribili nta stu melitu!
(G. Blasi, 1909)